ओलीको कारबाहीविरुद्ध नेपालसहितका नेताहरू सर्वाेच्चमा

काठमाडौँ । नेकपा एमालेका वरिष्ठ नेता माधवकुमार नेपालसहितका नेताहरु प्रधानमन्त्री तथा पार्टी अध्यक्ष केपी शर्मा ओलीले गर्न लागेको कारबाहीविरुद्ध रिट दर्ता गर्न सर्वाैच्च अदालतमा पुगेका छन् । आज बुधबार सर्वाेच्च अदालत पुगेर नेपाल, भीम रावल, घनश्याम भुसाल र सुरेन्द्र पाण्डेले रिट पेश गरेका हुन् ।

बैशाख १० गते नेकपा एमालेको संसदीय दलले नेपालसहितका नेतालाई कारबाही गर्ने सूचना प्राप्त भएको भएपछि उनीहरुले त्यसलाई रोक्न रिट निवेदन दर्ता प्रक्रियामा गएका हुन् । वरिष्ठ अधिवक्ता टिकाराम भट्टराईका अनुसार संसदीय दलले स्पष्टीकरण सोधी कारबाही गर्ने मनसाय देखाएको त्यो रोकी पाउँ भनेर रिट पेश भएको छ । उनले रिट दर्ता प्रक्रियामा रहेको जानकारी दिए । केन्द्रीय कमिटी खारेज गरेर महाधिवेशन कमिटी बनाउने, आफूहरूमाथि कारबाही चलाउने अध्यक्ष ओलीको निर्णय पार्टी विधान र कानुनको समेत विपरित भएको भन्दै उनीहरू सर्वोच्च गएका हुन् ।

नेपालसहितका नेताले प्रधानमन्त्री तथा संसदीय दलका नेता केपी शर्मा ओली, पार्टी महासचिव ईश्वर पोखरेल, निर्वाचन आयोग र सभामुखलाई विपक्षी बनाएर रिट पेश गरेका हुन् ।