राहदानी नवीकरण नगर्न नगराउन ७७ वटै जिल्लालाई राहदानी विभागको परिपत्र
काठमाडौं । राहदानी विभागले राहदानीको म्याद सकिन लागेको भए पनि तत्काल नवीकरण नगर्न नगराउन ७७ वटै जिल्ला प्रशासन कार्यालयलाई परिपत्र गरेको छ । धेरै सेवाग्राही तत्काल विदेश जान आवश्यक नपरे पनि राहदानीका म्याद सकिन लागेको भन्दै नविकरण गर्न जिल्ला प्रशासन कार्यालय र राहदानी विभाग धाइरहेका बेला विभागले यस्ताे परिपत्र गरेको हो ।
चालक अनुमति पत्र जस्तै म्याद नसकिदै राहदानी नवीकरण गर्नु नपर्ने, रादानी नवीकरण नभइ नयाँ नै बनाउनुपर्ने भएको र म्याद सकिएको कारण कुनै थप दस्तुर नलाग्ने र आवश्यक परेको जुनसुकै बखत बनाउने सकिने भएकाले तत्काल नविकरण गर्न जरुरी नभएको विभागका महानिर्देशक डोरनाथ अर्यालले नेपाल प्रेससँग बताए ।
उनले भने, ‘निकट भविष्यमा गुणस्तरी, निकै सुरक्षित र भरपर्दो विद्युतीय राहदानी इ–पासपोर्ट जारी हुदैँछ । त्यसैले अत्यावश्यक भएको अवस्था बाहेक राजानी बनाएर घरमा राख्नका लागि मात्र अहिलेको मेशिन रिडेबल राहदानी (एमआरपी) बनाउन जरुरी छैन ।’ विभागले यस्तो परिपत्र गरेलगत्तै कतिपय जिल्ला प्रशासन कार्यालयले पनि सूचना जारी गर्दै राहदानी नवीकरण नगर्न सर्वसाधारणलाई आग्रह गरेका छन् । जिल्ला प्रशासन कार्यालय कञ्चनपुरले बुधबार एक सूचना जारी गर्दै सर्वसाधारणलाई यस्तो जानकारी गराइसकेकाे छ ।
