नेकपा दाहाल-नेपाल पक्षले सांसदहरुलाई काठमाडौँ उपत्यका नछाड्न निर्देशन
काठमाडौँ । नेपाल कम्युनिस्ट पार्टी (नेकपा) दाहाल–नेपाल समूहले उपत्यका बाहिरका सांसदहरुदलाई तत्कालै काठमाडौं आउन तथा काठमाडौँमा भएका सांसदहरुदलाई जानकारीबिना उपत्यका बाहिर नजान निर्देशन दिएको छ । बैठकमा सहभागी नेतृ रामकुमारी झाक्रीले भनिन्, ‘संसदीय दलको बैठकले उपत्यका बाहिर रहेका सांसदहरुलाई तत्काल बोलाउने र काठमाडौँ उपत्यकामा भएका सांसदलाई जानकारी बिना बाहिर जान नदिने निर्णय भएको छ ।’ दाहाल-नेपाल समूहको संसदीय दलको बैठकले १३ दिनभित्रै संसद बैठक बस्नुपर्ने भएकाले यस्तो निर्देशन दिएको उनले बताइन् । बैठकमा प्रधानमन्त्री केपी शर्मा ओलीले राजीनामा दिनुपर्ने र अन्य दलहरुसंग सहकार्य गरेर जाने बारेमा पनि छलफल उनको भनाइ छ ।
बैठकमा अध्यक्षद्वय पुष्प कमल दाहाल ‘प्रचण्ड’ र माधव कुमार नेपालले आफूहरू सरकार बनाउनको लागि भन्दा पनि व्यवस्थाको लागि लडेको बताएका थिए । अध्यक्षद्वयले सर्वोच्चको फैसलालाई स्वागत गरेको र अव संविधानको रक्षा गर्दै अघि बढ्नुपर्ने समेत बताउनुभएको नेता देव गुरुङले जानकारी दिए । त्यस्तै संसदलाई व्यवस्थीत रुपमा अघि बढाउनका लागि आवश्यक सहकार्य गर्नुपर्नेमा बैठकले जोड दिएको उनले बताए । नेता गुरुङले प्रधानमन्त्री केपी शर्मा ओलीसँग आफैंले विघटन गरेको संसदमा गएर विश्वासको मत माग्ने नैतिकता नभएको समेत जिकिर गरे ।
यदि अविश्वासको प्रस्ताव सामना गर्ने हो भने आफूहरु पनि तयार रहेको उनले बताए । सरकारले दल विभाजन या अन्य कुनै अध्यादेश ल्याउन पनि सक्ने सन्दर्भमा उनले बाध्यकारी हिसाबले संसद बैठक बस्ने मिति नै तोकिएको अवस्थामा अध्यादेश आउन नसक्ने उल्लेख गरे । बैठकले प्रतिनिधिसभा विघटनको विरुद्ध आन्दोलनका क्रममा साथ दिने सबै पक्षलाई र सर्वोच्च अदालतले गरेको फैसला प्रति धन्यवाद ज्ञापन गरेको नेता गुरुङले जानकारी दिए । संसदीय दलको बैठकमा अध्यक्षद्वय दाहाल र नेपालसहित वरिष्ठ नेता झलनाथ खनाल, नारायणकाजी श्रेष्ठ लगायतका नेताहरु सहभागी थिए ।
यसअघि आजै बसेको दाहाल-नेपाल समूहको स्थायी कमिटी बैठकले संसदीय दलको बैठक बोलाउने निर्णय गरेको थियो ।
