बब डीलनको गीतहरुको सर्बाधिकार ३ सय मिलियन डलरमा खरिद गरेको अनुमान

नोबेल पुरस्कार विजेता संगीतज्ञ बब डीलनका ६ सय गीतको प्रतिलिपि अधिकार युनिभर्सल म्युजिकले खरिद गरेको छ । यसलाई संगीत इतिहासकै सर्वाधिक ठूलो कारोबार मानिएको छ ।

एक विज्ञप्ती जारी गर्दै युनिभर्सल म्युजिकले डीलनको गीतको क्याटालग खरिद गर्नेबारे सम्झौता गरिएको जनाएको न्यूयोर्क टाइम्सले उल्लेख गरेको छ । जसमा विश्वचर्चित गीत ब्लोन इन द वाइन्ड, द टाइम्स दे आर चेन्जिङ, लाइक अ रोलिङ स्टोन छन् ।

‘एउटा गीतकारको हकमा यो ऐतिहासिक कारोबार हो’ टाइम्सका संगीत सम्पादक बेन सिसारियोले लेखेका छन् । यो खरिदमा डीलनको सांगीतिक करियरको सुरुदेखि अन्त्यसम्मका गीत समावेश छन् । ७९ वर्षे डीलनको नयाँ एल्बम रग एन्ड राउडी वेज हालै रिलिज भएको थियो ।

खरिद मूल्य खुलाइएको त छैन तर, ३ सय मिलियन डलर मूल्यमा कपिराइट खरिद गरिएको अनुमान छ । ‘गीत लेख्ने कला सबै महान संगीत सिर्जनाको आधारभूत पक्ष हो । बब डीलन आफैमा कलाका महान प्रयोगकर्ता हुन्’ युनिभर्सल म्युजिक ग्रुपका सीइओ लुसियन ग्रेन्जले भने । तर, यो सम्झौताबारे डीलनले केही उल्लेख गरेका छैनन् ।

गतसाता अर्का संगीतज्ञ स्टिभ निक्सले आफ्नो सबै गीतको क्याटालगलाई ८० मिलियन डलर मूल्यमा प्राइमरी वेभ म्युजिकलाई बेचेका थिए ।