निर्वाचन हुँदैन भन्नेहरु गलत- प्रधानमन्त्री देउवा, ९ गते देउवाले मसँग चुनाव रोक्ने प्रस्ताव- केपी ओली
डडेलधुरा : नेपाली कांग्रेसका सभापित शेरबहादुर देउवाले मतदान गरेका छन्। देउवाले डडेलधुराको गन्यापधुरा वडा नम्बर १ स्थित असिग्राम मावि रुवाखोला मतदान केन्द्रबाट मतदान गरेका हुन्। मतदानपछि सञ्चारकर्मीसँग कुरा गर्दै देउवाले निर्वाचन हुँदैन भन्नेहरु गलत सावित भएको प्रतिक्रिया दिए ।
उनले भने, ‘निर्वाचन हुँदैन भन्नेहरु गलत सावित भए, ओलीजी पनि मतदान गर्दै हुनुहुन्छ होला ।’ देउवाले हर्षोल्लाका साथ मतदान गर्न मतदातालाई आग्रह गरे। डडेलधुरामा शान्तिपूर्ण ढंगले चुनाव भइरहेको जनाइएको छ ।
मतदान गर्न देउवा करिब १ हप्तादेखि गृहजिल्ला डडेलधुरामा छन्। देउवा आजै काठमाडौं फर्किने कार्यतालिका छ ।
भोट हालेपछि ओलीको खुलासा- ९ गते देउवाले मसँग चुनाव रोक्ने प्रस्ताव गर्नुभएको थियो (भिडियो)
काठमाडौं । एमाले अध्यक्ष केपी शर्मा ओलीले प्रधानमन्त्री शेरबहादुर देउवाले आफूलाई केही दिनअघि मात्रै स्थानीय तहको निर्वाचन पछि धकेल्ने औपचारिक प्रस्ताव गरेको खुलासा गरेका छन् ।
आज मतदान केन्द्र पुगेर भोट खसाइसकेपछि सञ्चारकर्मीसँग कुरा गर्दै उनले यस्तो खुलासा गरेका हुन् । ओलीका अनुसार गत ९ गते स्थानीय चुनाव पर सार्न देउवाले गरेको प्रस्ताव उनले अस्वीकार गरेका थिए ।
‘उहाँले औपचारिक प्रस्ताव गर्नुभएको थियो । तर, मैले देशलाई द्वन्द्वमा लैजानु हुँदैन, तपाईं अलोकतान्त्रिक बाटो नहिँड्नुस भनेर राम्रैसँग खबर पठाइदिएँ,’ ओलीले भने । उनले याे कुरा आफूले आज पहिलाेपटक सार्वजनिक गरेकाे पनि जानकारी दिए ।
गठवन्धनले चुनाव सार्नका लागि धेरै बहाना खोजे पनि सफल नभएको ओलीले बताए ।
‘हामी सहमत भएपछि र कानूनी व्यवस्थाका कारण उहाँहरु चुनाव गराउन वाध्य हुनुभएको हो । नत्र मुद्दामा गएर हुन्छ कि झगडा गरेर हुन्छ कि अनेक तरिकाले चुनाव रोक्न खोज्नुभएको थियो । यो चुनाव गराउन हामीले धेरै पापड बेल्नु परेको छ,’ ओलीले भने ।
स्रोत- नेपालप्रेस
