स्थानीय निर्वाचनमा तालमेल गर्न बाबुरामको पृथ्वीसुब्बासँग प्रस्ताव
काठमाडौं । जनता समाजवादी पार्टी (जसपा) का संघीय परिषद अध्यक्ष डा. बाबुराम भट्टराईले स्थानीय तहको निर्वाचनमा सत्तारुढ गठबन्धन भनेर बस्ने अवस्था नरहेको बताएका छन् ।
नेकपा एमालेका उपमहासचिव पृथ्वीसुब्बा गुरुङसँग पूर्वप्रधानमन्त्री भट्टराईले स्थानीय चुनावमा मिलेर जाने बातावरण बनाउनुपर्ने बताएका हुन् । ‘केपी ओलीले संविधानमाथि संकट ल्याउन लाग्यो भनेर लागेकै हो । प्रतिगमन भनेकै हो । तर अब प्रतिगमन भनेर बसिरहनु पर्दैन’, भट्टराईले भनेका थिए । एमालेविरुद्ध गठबन्धन बनाएरै लागेपनि अब नयाँ परिस्थिति अनुसार निर्णय लिनुपर्ने भट्टराईले बताएका थिए ।
उपमहासचिव गुरुङसँग डा.भट्टराईले स्थानीय तहको चुनावमा मिलेर जान सकिने बताएका हुन् । ‘स्थानीय तहमा गठबन्धन (सत्ता गठबन्धन) भनिरहनु पर्दैन, हामी मिलेर जानुपर्छ’, भट्टराईले भनेका थिए ।
जवाफमा गुरुङले पनि एमाले तयार रहेको बताए । ‘हामी पनि स्थानीय चुनावमा आवश्यकताको आधारमा गठबन्धन गर्ने भन्ने पक्षमै छौं’, उपमहासचिव गुरुङले भने ।
पूर्वप्रधानमन्त्री भट्टराईको निवासमा उपमहासचिव गुरुङसँग भेटवार्ता भएको थियो । गुरुङसँग भएको भेटर्वार्ताको तस्वीर भट्टराईले सामाजिक सञ्जाल मार्फत् सार्वजनिक गरेका छन् ।
