न्यूर्योकस्थित अपार्टमेन्टमा आगलागी, कम्तीमा १९ जनाको मृत्यु
एजेन्सी । अमेरिकाको न्यूयोर्कस्थित एक अपार्टमेन्ट भवनमा आगलागी हुँदा कम्तीमा १९ जनाको मृत्यु भएको छ। मृत्यु हुनेमा ९ बालबालिका रहेको स्थानीय अधिकारीलाई उद्धृत गर्दै अमेरिकी सञ्चारमाध्यमले जनाएका छन् ।
३२ जनालाई उपचारका लागि अस्पताल पठाइएको र त्यसमध्ये केही गम्भीर अवस्थामा रहेको न्यूयोर्कका मेयर एरिक एडम्सले बताएका छन् । १९ तले भवनमा आगलागी भएको हो । अग्नि नियन्त्रण विभागका आयुक्त ड्यानिएल निग्रोका अनुसार रहेक तलामा प्रभावितहरु भेटिएका छन् । आगलागी भीषण रहेको उनले बताए ।
उनले एनबिसी न्यूजसँग आगलागीका कारण पछिल्लो ३० वर्षमा न्यूयोर्कमा यति धेरै संख्यामा मानवीय क्षति भएको यो पहिलो घटना रहेको बताएका छन् । केही दिनअघि फिलाडेलफियामा अपार्टमेन्ट भवनमा आगलागी हुँदा १२ जनाको ज्यान गएको थियो । मृत्यु हुनेमा ८ जना बालबालिका थिए ।
न्यूयोर्कमा आइतबार आगलागी भएको हो । ब्रोन्स अपार्टमेन्टको दोस्रो र तेस्रो तलबाट आगलागी सुरु भएको हो । विद्युतीय हिटरका कारण आगलागी भएको हुन सक्ने अनुमान गरिएको छ । आगो नियन्त्रणका लागि करिब २०० जना अग्नि नियन्त्रक खटिएका छन् ।
