सनमन गुरुङ्गको अर्को/दोस्रो म्युजिक भिडियो, असोज २७ गते रिलिज हुँदै

लन्डन । पुरानो घर पोखरा राम बजार पेन्सन क्याम्प भई हाल लन्डन बस्दै आउनु भएका सनमन गुरुङ्गले “माँझी दाई” बोलको पहिलो गीत सार्वजनिक गरे लगत्तै केही समयको अन्तरालमा अर्को वा दोस्रो गीत- “मन आज” नामको गीत म्युजिक भिडियो सहित सार्बजनिक गर्ने तयारी गरिरहेको कुरा खबर यूकेलाई जानकारी गराउनुभएको छ । दुई हप्ता अगाडी गत असोज १ गते सनमनको “माँझी दाई” गीत प्रेमियर गरेको थियो । सनमनकै युट्युब च्यानल मेरो संसारमा रिलिज गरिएको उक्त गीत अहिलेसम्मा चौबिस हजार बढी दर्शकहरुले हेरीसकेका छन ।

सनमन गुरुङको आफ्नै रचना तथा संगीत रहेको उक्त गीत देश भक्ति भावनाले भरिएको र पुज्यनिय बाबा आमाप्रति समर्पित गरिएको छ । गीतमा कालिका स्कुल पोखराको शिक्षक ज्ञान थापाले स्वर दिनुभएको छ भने संगीत मिलाउने काम चाहिं देउराली ब्याण्ड पोखराको सदस्य तेज केसीले गर्नुभएको छ । गीत पोखराको एपोस्टल स्टुडियोमा रेकर्ड गरिएको हो भने रेकर्ड तथा मिक्सिङ्ग अनिल शाही ठकुरीले गर्नुभएको हो । गीतको भिडियो भने असलसाथी प्रडक्सनले निर्माण गरेको छ साथै गीतको बजारीकरण पनि असलसाथी प्रडक्सनले नै गरेको छ ।

कालिका माध्यमिक पोखराको भुपु शिक्षक सनमन उही बेलादेखि कबिता अनि गीत लेखनमा रुचि राख्नुहुन्थ्यो । विभिन्न कारणबस संगीत क्षेत्रमा चाहिए अनुसार वा पूर्ण रुपमा लाग्न नसके ता पनि पछिल्लो समय कामसँगै आफ्नो रुचिको क्षेत्र गीत संगीतमा पनि समय दिईराख्नुभएको छ । फलस्वरुप एक पछि अर्को (ब्याक टु ब्याक) गीतहरु निकाल्ने क्रममा हुनुहुन्छ ।

भुपु शिक्षक सनमन गुरुङ फुटबलमा पनि उत्तिकै दख्खल हुनुहुन्थ्यो र उहाँ गण्डकी अंचलको फुटबल खेलाडी हुनुहुन्थ्यो । उहाँ तमु धिं यूकेको पनि महासचिब हुनुन्थ्यो । गुरुङ्गले आफ्नो पहिलो गीत “माझी दाई” जसरी दर्शक तथा स्रोताहरुले माया अनि साथ दिनुभयो त्यसरी नै दोस्रो गीत “आज मन” गीतलाई पनि साथ र सहयोग हुने अपेक्षा तथा अनुरोध गर्नुभएको छ ।

“आज मन” गीत सनमन गुरुङको आफ्नै युट्युब च्यानल मेरो संसारमा आगामी असोज २७ गते २०७८ साल बुधबार दिउसो ४ बजे सार्वजनिक गरिनेछ ।