मेक्सिकोको एन्ड्रिया भइन मिस युनिभर्स–२०२०
एजेन्सी । ‘मिस युनीभर्स’ को ६९ औं संस्करणको विजेता एन्ड्रिया मेजा बनेकी छिन् । मे १६ मा संयुक्त राष्ट्र अमेरिकाको सेमिनोल हार्ड रक होटल एन्ड क्यासिनो हलिउडमा भएको यस प्रतियोगितामा मेक्सिकोकी सुन्दरीले बाजी मारेकी हुन् । अन्तिम चरणमा सुन्दरताको बद्लिदो मापदण्डको शिर्षकमा आफ्नो उत्कृष्ट भनाई राख्दै उनी मिस युनिभर्स २०२० की विजेता बनेकी हुन् । यसका साथै उनले प्रश्नउत्तरको चरणमा पनि कोभिड–१९ महामारीलाई कसरी ह्यान्डल गर्नुहुन्छ भन्ने प्रश्नमा दिएको उत्तरले पनि उनलाई उपाधि जिताउन मद्दत गरेको थियो ।
ब्राजिलकी सुन्दरी जुलिया गामा, पेरुकी सुन्दरी जेनिका मसेटा र भारतकी सुन्दरी एडलाइन क्यास्टेलिनो क्रमशः फस्र्ट, सेकेन्ड र थर्ड रनरअप बनेका छन् । सुन्दरी प्रतियोगीतामा भाग लिन नेपालबाट आंशिका शर्मा गएकी थिइन् । आंशिकासँगै यो प्रतियोगीतामा नेपालबाट अहिलेसम्म चारजना सुन्दरीहरुले सहभागीता जनाइसेका छन् । जसमा सन् २०१७ मा नगमा श्रेष्ठ, सन् २०१८ मा मनिता देवकोटा र सन् २०१९ मा प्रदीप्ता अधिकारी । आंशिका शर्मा मिस नेपाल २०२० की फस्र्ट रनरअप हुन् ।
सन् २०२० मा आयोजना हुनुपर्ने मिस युनिभर्स कोरोना कहरका कारण एकवर्ष पछाडि धकेलिएको हो । यस वर्षको मिस युनिभर्सका होस्ट पूर्व मिस युनिभर्स विजेता ओलिभिया कल्पो र मारियो लोपेज हुन् । विभिन्न देशका ७४ जना सुन्दरीले यस वर्षको मिस युनिभर्स उपाधिका लागि सहभागिता जनाएका थिए । जसमध्ये उत्कृष्ट २१ जनाले मात्रै अन्तिम चरणसम्म जाने मौका पाएका थिए ।
