सुकुमबासीको विरोध प्रदर्शन जारी, घेरे काठमाडौं महानगरको कार्यालय
काठमाडौंको थापाथलीस्थित बागमती नदी किनारका सुकुमबासीले काठमाडौं महानगरपालिकाको कार्यालयअगाडि विरोध प्रदर्शन गरेका छन् । ठूलाे संख्यामा जम्मा भएका सुकुमबासीले आफूहरूलाई बस्तीबाट महानगरपालिकाले बलपूर्वक हटाउन लागेकोमा विरोध प्रदर्शन गरेका हुन् ।महानगरपालिकाले सोमबार सुकुमबासी बस्ती हटाउन डोजर लिएर गएपछि सो क्षेत्र तनावग्रस्त बनेको थियो ।
महानगरपालिकाको कदमप्रति सुकुमबासीले प्रतिरोध गर्दा केही महानगर प्रहरी घाइतेसमेत भएका थिए । नाराबाजीसहित महानगरपालिका पुगेका सुकुमबासीले महानगरपालिकाका प्रमुख बालेन्द्र साहविरुद्ध नाराबाजी गरे । उनीहरूले ‘सुकुमबासी एक होऔँ’, ‘बालेन साह होसियार’, ‘सूचनाआतंक बन्द गर’लगायतका नारा लगाएका थिए ।
‘भूमिहीन, सुकुमबासी, अव्यवस्थित बसोवासी र स्ववासीका घर, टहरा जबर्जस्ती हटाउन प्रकाशित सूचनाविरुद्ध बृहत् खबरदारी र्याली’ नाम दिइएको विरोध प्रदर्शनमा निधारमा कालोपट्टी बाँधेर प्रदर्शनकारी उपस्थित भएका थिए। सुकुमबासीसम्बद्ध दुई दर्जनभन्दा बढी संघ, संगठन र मोर्चाहरको नाममा विरोध प्रदर्शन भएको हो ।
व्यवस्थापन नगरी महानगर एकतर्फी ढंगले अघि बढ्यो : भूमि आयोग
राष्ट्रिय भूमि आयोग, काठमाडौंले सुकुमबासीको उचित व्यवस्थापनविना नै काठमाडौं महानगरपालिका डोजर लिएर बस्ती भत्काउन पुगेको आरोप लगाएको छ । मंगलबार न्युज एजेन्सी नेपालसँग कुरा गर्दै आयोगका काठमाडौं अध्यक्ष श्यामकृष्ण प्रजापतिले महानगर एकतर्फी ढंगले अघि बढेको बताए। चुनावका वेला आचारसंहिताका कारण काम गर्न नपाएको भन्दै उनले अहिले लागत संकलनमा आयोग जुटेको स्पष्ट पारे ।
आयोगले लागत संकलन गरी वास्तविक सुकुमबासीहरूको पहिचान नगरी महानगर डोजर लिएर गएको कुरा उचित नभएको उनको भनाइ छ । उनले यस्ता गतिविधि रोक्न र सही तरिकाबाट हल निकाल्न वार्ताको विकल्प नरहेको प्रस्ट पारे। ‘महानगर एकतर्फी ढंगले अघि बढेको भन्ने जानकारी पायौँ । लागत संकलन गर्ने, वास्तविक पहिचान गर्ने र उनीहरूलाई कहाँ व्यवस्थापन गर्ने भन्नेबारेमा सोचर मात्रै अघि बढेको भए राम्रो हुन्थ्यो,’ उनले भने ।
अध्यक्ष प्रजापतिले सुकुमबासीका लागि इचंगुनारायणमा बनाइएको अपार्टमेन्टमा बस्नै नदिने कुरा त्यहाँका वडाध्यक्षले गरेकाले महानगरले त्यसबारेमा स्पष्ट धारणा राख्नुपर्ने बताए । उक्त अपार्टमेन्टमा एक सय ३४ परिवार राख्ने भनिए पनि लागत संकलनपछि मात्रै सुकुमबासीको यकिन तथ्यांक थाहा हुने उनले उल्लेख गरे ।
