पुकार बम र रमेश खरेलसँग भोट बाँडिदा हारे रवीन्द्र मिश्र
काठमाडौं क्षेत्र नम्बर १ मा नयाँ उम्मेदवारहरूबीच मत बाडिँदा नेपाली कांग्रेसका उम्मेदवार प्रकाशमान सिंहले १३२ मतको झिनो अन्तरले जीत हात पारेका छन् । यहाँ प्रकाशमानले ७१४३ मत पाएका छन् भने उनका प्रतिस्पर्धी राष्ट्रिय प्रजातन्त्र पार्टीका उम्मेदवार रवीन्द्र मिश्रले ७०११ मत पाएका छन् ।
काठमाडौं- १ मा विगतमा कांग्रेसको ठूलो मत थियो । यसपालि कांग्रेसको मत पनि केही बाँडिएको देखिन्छ। कांग्रेसको १४ औं महाधिवेशनलाई लिएर काठमाडौं १ का केही कांग्रेस सिंहसँग असन्तुष्ट थिए । सिंहले अन्तिम समयमा सभापतिमा शेरबहादुर देउवालाई समर्थन गरेका थिए । अघिल्लोचोटि नेकपा एमाले र माओवादीको वाम गठबन्धनका बाबजुद प्रकाशमान १०९३६ मत ल्याएर विजयी भएका थिए। त्यति बेला पराजित मिश्रले विवेकशील साझा पार्टीबाट १०११८ मत ल्याएका थिए भने वाम गठबन्धनका उम्मेदवार अनिल शर्माले ५३३६ मत ल्याएका थिए ।
यसपटक यहाँका सबै उम्मेदवारको मत घटेको छ। घटेको मत नयाँ उम्मेदवारहरूमा बाँडिएको देखिन्छ । कुल २७०१० मत खसेको यो क्षेत्रमा २११५ मत बदर भएको थियो। राष्ट्रिय स्वतन्त्र पार्टीका पुकार बम तेस्रो स्थानमा छन् । उनले नेकपा एमालेका किरण पौडेललाई उछिनेका छन् । पुकार बमले ४११२ मत ल्याएका छन् भने किरण पौडेलले ३५०८ मत ल्याएका छन् । नेपाल सुशासन पार्टीका रमेश खरेलले पनि ३१२१ मत ल्याएका छन् ।
यहाँ रवीन्द्र मिश्र, पुकार बम र रमेश खरेलको मत जोड्ने हो भने १४२४४ मत पुग्छ। राप्रपाका उम्मेदवार मिश्रले चुनाव प्रचारका बेलादेखि नै भोट बाँडिन सक्ने र त्यसो नगर्न मतदातालाई आग्रह गरिरहेका थिए । उम्मेदवारहरूबीच मत बाडिँदा मिश्र झिनो मतले पराजित भएका छन् ।
