बाइडेन र पुटिनबीच भर्चुअल वार्ता हुँदै
वासिङटन : अमेरिकी राष्ट्रपति जो बाइडेन र रुसी राष्ट्रपति भ्लाद्मिर पुटिनबीच भर्चुअल वार्ता हुने भएको छ । युक्रेन सम्बन्धमा दुई देशका राष्ट्रपतिबीच मंगलबार भर्चुअल वार्ता हुन लागेको हो । अमेरिकी राज्य सचिव एन्टोनी ब्लिङकनले रुसले युक्रेनमाथि जुनसुकै समयमा आक्रमण गर्न सक्ने योजना बुनेको र त्यसको प्रमाण अमेरिकासँग भएको बताएपछि बाइडेनले पुटिनसँग भर्चुअल वार्ता गर्न लागेको अन्तर्राष्ट्रिय मिडियामा खबर छ ।
पछिल्लो समय रुस र युक्रेनबीच तनाव बढिरहेको छ । रुस र युक्रेनको सीमा नजिकै रुसले ठूलो संख्यामा सैनिक तैनाथ गरेको र जुनसुकै समयमा आफूमाथि हमला हुने युक्रेनले बताउँदै आएको छ । यद्यपि, युक्रेनमाथि आक्रमण गर्ने सम्बन्धमा आफ्नो कुनै मनसाय नभएको र सीमा क्षेत्रमा युक्रेनले आफ्नै सेना परिचालन गरेको आरोप रुसले लगाउँदै आएको छ ।
मंगलबारका लागि तय भएको भर्चुअल वार्तामा बाइडेनले दुवै देशको सीमा क्षेत्रमा रुसी सेनाले गरेको गतिविधिबारे चासो राख्ने बताइएको छ । युक्रेनको सार्वभौमसत्ता र अखण्डताका लागि अमेरिकाले समर्थन गर्ने सम्बन्धमा समेत दुवै राष्ट्रपतिबीच छलफल हुने शनिबार अमरिकी राष्ट्रपतिको कार्यालय ह्वाइट हाउसद्वारा जारी विज्ञप्तीमा जनाइएको छ।
