अमेरिकाको ओहायोमा आगलागी हुँदा पाँच नेपाली भाषी भुटानीको मृत्यु
एजेन्सी । अमेरिकाको ओहायोस्थित एक्रोनमा आइतबार भएको आगलागीबाट ५ जना नेपालीभाषी भुटानीहरुले ज्यान गुमाएका । यो आगलागीबाट ज्यान गुमाउनेमा तीनजना बालबालिका समेत रहेका छन् त्यहाँस्थित प्रहरी अधिकारीहरुले जनाएका छन् । आगलागीमा परेर उक्त घरमा रहेका अन्य ४ जना घाइते भएका छन्।
घाइतेहरुको एक्रोनकै स्थानीय अस्पतालमा उपचार भइरहेको छ । मेरिल्याण्ड जनरल एसेम्बलीका डेलिगेट ह्यारी भण्डारीले ज्यान गुमाउनेप्रति श्रद्धाञ्जली दिँदै घाइते सर्वजीत सुब्बासहित सबैको स्वास्थ्यलाभको कामना गरेका छन् ।
घरमा आगोको ठूलो ज्वाला देखेपछि छिमेकीहरु दौडिएर पुगेका थिए । त्यसपछि तत्कालै उद्धारकर्मीहरुलाई बोलाएर उद्धार थालिएको थियो । यो आगलागीमा ज्यान गुमाउनेहरुमा ५ वर्षीय, ११ वर्षीय र १६ वर्षीय बालबालिका छन् । ज्यान गुमाउने अन्य दुईजनामा ६० वर्षीय पुरुष र ४८ वर्षीया महिला पनि रहेका छन् ।
