डेब्यु खेलमा रोनाल्डो चम्कदाँ म्यान्चेस्टर युनाइटेडको शानदार जित
ओल्ड ट्राफोर्ड, म्यान्चेस्टर । डेब्यु खेलमा क्रिष्टियानो रोनाल्डोको निर्णायक गोलको मद्दतमा म्यान्चेस्टर युनाईटेडले जित हासिल गरेको छ । ओल्ड ट्राफोर्डमा शनिबार राति सम्पन्न ईङ्गलिश प्रिमियर लिगको खेलमा म्यान युले न्युकासल युनाईटेडमाथि ४-१ गोल अन्तरको जित निकालेको हो ।
म्यान युको जितमा १२ वर्षपछि म्यान यु फर्किएका रोनाल्डोले दुई गोल गर्दा ब्रुनो फर्नान्डेज र जेसि लिङ्गार्डले एक एक गोल गरे । न्युकासलको लागि जाभियर मान्किलाले एक गोल फर्काए । पहिलो हाफको ईन्ज्युरी समयको दोश्रो मिनटमा रोनाल्डोले गोल गर्दै म्यान युलाई १–० गोल अन्तरको अग्रता दिलाएका थिए ।
मेसन ग्रिनवुडले गरेको लो सट प्रहार न्युकासलका गोलकिपर फ्रेडी वुडम्यानबाट रिबाउण्ड हुँदा रोनाल्डोले वान टचमा गोल गर्दै आफ्नो पुनरागमनाई शानदार रुपमा दिएका थिए । यसपछि खेलको ५६औं मिनटमा सेन्ट म्याक्सिमिनको पासमा मान्किलोले गोल गर्दै न्युकासललाई खेलमा बराबरी गोल दिलाएका थिए । तर खेलको ६१औं मिनटमा ल्युक श को थ्रु पासलाई सदुपयोग गर्दै रोनाल्डोले सुन्दर गोल गर्दै म्यान यु लाई खेलमा पुन दोश्रोपटक अग्रता दिलाएका थिए ।
खेलको ८० औं मिनटमा पोल पोग्बाको पासलाई फर्नान्डेजले १८ यार्डको बक्सभन्दा बाहिरबाट प्रहार गरेको बल गोलमा परिणत हुँदा म्यान युले खेलमा ३–१ गोल अन्तरकोअग्रता दिलाए । निर्धारित समयको सक्किएपछिको ईन्ज्यरी समयमा जेसि लिङ्गार्डले अर्काे एक गो थप्दै म्यान युलाई ४–१ गोल अन्तरको जित दिलाए । म्यान युका प्रशिक्षक ओले गन्नर सोल्साएरले रोनालडोलाई अग्रपंक्तिको जिम्मेवारी सुम्पिदै शुरुवाती ११ मा स्थान दिएका थिए । रोनाल्डोले पुरै समयको खेलमा बलियो उपस्थिती देखाएका थिए ।
जितसँगै म्यान यु ४ खेलमा १० अंकका साथ शिर्ष स्थानमा उक्लिएको छ । हार ब्यवहोरेको न्युकासल भने १ अंकका साथ पुछारबाट दोश्रोमा छ ।
