महिला अभियान्त सरस्वती केसीद्वारा NRNA यूकेको महिला उपाध्यक्षमा उम्मेदवारी
लण्डन । लन्डनमा एकजना क्रियाशील महिला अभियन्ता तथा युवा ब्यबसायी सरस्वती केसीले एनआरएनए यूकेको आसन्न निर्वाचनमा महिला उपाध्यक्षमा उम्मेदवारी दिने घोषणा गरेकी छिन् । हिजो एक प्रेश बिज्ञप्ती जारी गर्दै उनले संस्थागत सुधार र आम नेपालीको साझा संस्था बनाउन आफु लागीपर्ने बताउंदै आफू चुनावी मैदानमा उत्रने निष्कर्षमा पुगेको जनाइन् ।
ए्नआरएनए यूकेमा बढ्दै गएको बेथिती विसंगति, अराजकता, अड्डाअदालती झण्झट मुक्त गराउंदै पारदर्शी, जवाफदेहीता सहित संगठन सुदृढीकरणका लागि उम्मेदवारी दिने मनस्थिति बनाएको उनले बताइन् । ‘म बेलायतमा लामो समयदेखि समाज रुपान्तरणका लागि क्रियाशिल रहिरहें । आफ्नो सांगठनिक अनुभव अब एनआरएनए यूकेमा खर्चने मेरो योजना छ’, केसीले भनिन् ।
केसीले संस्थाको लक्ष्यप्राप्तिका लागि अग्रजहरुले अवलम्बन गरेको अधुरा योजना तथा नीति नियम कार्यान्वयन गर्ने, संस्थालाई सहभागितामुलक, समावेशी, युवा र महिलामैत्री बनाउंदै बेलायतका आमनेपालीसम्म विस्तार गर्ने, नेपालीले सन्चालन गरेका साना तथा मझौला उद्यमलाई थप सवलीकरण बनाउन आफ्नो अनुभव र ज्ञान आदानप्रदान गर्ने, महिला सशक्तिकरण जस्ता प्रमुख एजेण्डा अघि सारेकी छन् । ‘नयां निर्वाचित हुने अध्यक्षसहित समस्त कार्यसमितिलाई पूर्ण सहयोग गर्ने पनि मेरो उद्देश्य हुनेछ’, उनले भनिन् ।
वर्तमान कार्यसमितिमा सदस्य निर्वाचित हुंदा उनले सर्वाधिक मत ल्याएर विजयी भएकी थिइन् । आफ्नो कार्यसमितिका हरेक गतिविधिमा सहभागिता र साथ दिएका कारण पनि केसी आसन्न निर्वाचनमा सशक्त दावेदार मानिन्छन् । झण्डै दुई दशकअघि बेलायत आएर सामान्य संघर्षपूर्ण जागिरे जीवन हुंदै अहिले लन्डनमा रेष्टुरेन्ट व्यवसाय सन्चालन गरिरहेकी केसी च्यारिटी कर्ममा सधैं अग्रपंक्तिमा छिन् । सस्तो लोकप्रियताभन्दा व्यवहारमा काम देखाउने, स्पष्ट वक्ता, सहयोगी र मिजासिलो स्वभावका कारण उनी बेलायतमा सबैको ‘प्रिय’ छन् ।
नेपालमा अन्तरराष्ट्रिय डेनिस सहयोगी संस्थामा दशकबढी काम गरेकी सरस्वती महिला सशक्तिकरणकी प्रशिक्षिका र अधिकारकर्मी पनि हुन् । सिंगो धौलागिरीलाई कार्यक्षेत्र बनाई नेपालमा उनले १५औ बर्ष सामाजिक अभियन्ताको रुपमा बिकासबादी महिला कार्यकर्ता भइ बिताईन भने बेलायत आए देखी बिगत २ दशक सकृयता पूर्बक सामाजिक रुपान्तरणमा लागी परेकी सरस्वती एक शशक्त र दरिलो दाबेदारको रुपमा मैदानमा देखिन्छिन ।
