१०० वर्षको बृद्ध छविलालले लगाए कोरोनाविरुद्धको खोप
हेटौंडा । नेपालमा दोस्रो चराणको कोरोना बिरुध्दको खोप अभियान सुरु भए लगत्तै आज देश भरका गाउपालिकाहरुमा ६५ बर्ष नाघेका ब्रिध्दहरुलाई खोप लगाउन सुरु गरिएको थियो । यसै क्रममा मकवानपुरगढी गाउँपालिकामा ६५ वर्षभन्दा माथि उमेर समूहका ज्येष्ठ नागरिकलाई कोरोना भाइरसविरुद्धको खोप लगाउने कार्य सुरु गरिएको थियो । गाउँपालिकाको वडा नम्वर–४ निवासी १०० वर्षीय ज्येष्ठ नागरिक छविलाल लामिछानेलाई खोप लगाएर अभियान सुरु गरिएको गाउँपालिकाका स्वास्थ्य संयोजक ध्रुव लामिछानेले जानकारी दिए ।
संयोजक लामिछानेका अनुसार कोभिड–१९ अस्थायी अस्पताल मक्राञ्चुलीमा हालसम्म ६५ वर्षमाथि उमेर समूहका वडा नम्वर ३ र ४ का ३० जना ज्येष्ठ नागरिकले खोप लगाइसकेका छन् । आउँदो चैत २ गतेसम्म ज्येष्ठ नागरिकलाई खोप लगाउने कार्यक्रम रहेको गाउँपालिकाले जनाएको छ । मकवानपुरगढी गाउँपालिकाका ५३ जनामा हालसम्म कोरोना भाइरसको संक्रमण पुष्टि भएको छ भने उनीहरु सबै संक्रमणमुक्त भइसकेका छन् ।
पालिकाभित्रका र अन्य व्यक्तिलाई कोरोनासँगै अन्य रोग लाग्न नदिनको लागि स्वास्थ्य सेवाको पहुँच नागरिकस्तरमा वृद्धि गरिएको र स्वास्थ्य सामग्रीसमेत वितरण गरिएको गाउँपालिकाका प्रमुख प्रशासकीय अधिकृत रामकुमार पुडासैनीले रातोपाटी समक्ष बताए ।
