रघुजी पन्तको अभिव्यक्तिप्रति महिला अधिकारकर्मीको आपत्ति
काठमाडौं । प्रचण्ड-माधव पक्षीय नेकपाका नेता रघुजी पन्तले राष्ट्रियसभा सांसद कोमल वलीप्रति गरेको अभिव्यक्तिप्रति महिला अधिकारकर्मीहरूले ढिलै भएपनी आपत्ति जनाएका छन् । महिलाको क्षमता मूल्यांकन गरेर भन्दा उनीहरूको शारीरिक अंगहरूलाई लिएर टिकाटिप्पणी गर्नु बिडम्बना भएको उनीहरूको भनाइ छ।
‘महिला अस्तित्वलाई उपयोगिता र उपभोगसँग दॉंजेर हेर्नु पितृसत्ताबाट आरक्षित अधिकारप्राप्त पुरूषको अहम र आडम्बर हो,’विज्ञप्तिमा भनिएको छ, ‘आधा जनसंख्या भएका महिलाको स्थान निकै कम आँकलन हुनु र उनीहरूको सक्षमता र सबलतालाई स्वतन्त्र मूल्यांकन नगर्नु सामाजिक बिडम्बना हो। स्मरण रहोस् कि राजनीतिक महत्वका स्थानमा महिलाको अत्यन्तै न्यून सहभागिता रहेको अवस्था छ।’
महिलाको शरीर र यौनिकतालाई केन्द्रबिन्दू टिप्पणी गर्नु मानव अधिकारको हनन् भएको समेत उनीहरूको ठहर छ । ‘महिलाको शरीर र यौनिकतालाई केन्द्रिविन्दु बनाइ राजनितीमा संलग्न महिलाको खिल्ली उडाउने, कुनै पनि व्यक्तिको आत्मसम्मानमा ठेस पुग्ने गरी यसरी सार्वजनिक रूपमा दिने अभिव्यक्ति मानव अधिकारको हनन् हो,’ उनीहरूको भनाइ छ, ‘यो अभिव्यक्ति आम महिलाको आत्मसम्मान, स्वतन्त्रता र मानव अधिकार विरोधी छ। महिलाको शरीर र यौनिकताका विषयलाई राजनैतिमा खिल्ली उडाउने, हाँसो र ठट्टाको विषय बनाउने कार्य जो कोहीबाट भएपनि निन्दनीय छ, यस भनाईको हामी भत्सर्ना र खुलेर विरोध गर्दछौं।’
ऐक्यबद्धता जनाउने व्यक्ति तथा संस्थाहरू प्रणिका कोयू, मानवी पौडेल, संजिता तिम्सिना, टिका दाहाल, नितु पोखरेल, इन्दिरा घले, कल्पना झा, सपना संजिवनी, हेमलता राई, नीति अर्याल खनाल, रूखसाना कपाली, स्वेता ज्ञानु बानियाँ, अस्मिना रञ्जित, कला कोयू, मिना तामाङ्ग, सबिता पोखरेल, राजेन्द्र महर्जन, बच्चु हिमांशु, प्रज्वल तुलाचन, मुनु राई, सायरा कार्की, चादँनी राना, प्रतिमा गुरुङ, भावना राउत, संजोग ठकुरी, डा. रेणु अधिकारी, लोक्शरि कुँवर, तुलसा अधिकारी सामाजिक न्यायका लागि महिला सञ्जाल, महिला मानव अधिकार रक्षकहरुको राष्ट्रिय संजाल, अन्तरपुस्ता फेमिनिष्ट सञ्जाललगायत छन् ।
