मिस युनिभर्स नेपाल २०२० को उपाधि अष्ट्रेलिया निवासी २४ वर्षिया अनिष्का शर्मालाई
मिस युनिभर्स नेपाल २०२० को उपाधि अष्ट्रेलिया निवासी २४ वर्षिया अनिष्का शर्माले जितेकी छन् । राजधानीमा बुधबार आयोजित ग्रान्ड फिनालीमा पूर्व मिस युनिभर्स नेपाल नग्मा श्रेष्ठले शर्मालाई ताज लगाइदिइन् । कोभिड–१९ पछि तपाइँले सिकेको एउटा पाठ के हो भन्ने निर्णायकको प्रश्नको सन्तोषजनक उत्तर दिदै शर्मा प्रथम भएकी हुन ।
अनिष्काको जवाफ थियो : म कोभिड–१९ ले सिर्जना गरेको संकट फेस गर्न म जहिल्यै तयार छु । तर, यो संकटले अर्थतन्त्र महत्वपूर्ण हो भन्ने सिकाएको छ । यो कुरा ख्याल गरेर हामी अगाडि बढ्नुपर्छ ।’
जितसँगै अनिष्काले १० लाख नगद र मिस युनिभर्सको अन्तराष्ट्रिय प्रतिस्पर्धामा भाग लिने मौका पाउनेछिन् । आफूलाई शैक्षिक अभियन्ता पनि मान्ने शर्माले मिस फियर्सको सब–टाइटल पनि जितिन् । मिस नेपाल अमेरिका सुजिता बस्नेतले फस्ट–रनरअपको उपाधि जितिन् ।
नीनाकान्त मण्डलले सेकेन्ड रनरअपको उपाधि जितिन् । न्यान्सी खड्का फोर्थ रनरअप भइन् । फिनालीमा १८ जना सुन्दरीले भाग लिएका थिए । पूर्वमिस नेपाल माल्भिका सुब्बा, मेगा बैंककी सीइओ अनुपमा खुन्जेली, अभिनेत्री उषा रजक लगायत निर्णायकमा थिए ।
मिस नेपाल आयोजक हिडन ट्रेजरबाट हटेर पहिलोपटक कुनै इन्डिपेन्डेन्ट संस्थाले पेजेन्ट गरेको हो । गतवर्ष मिस युनिभर्सको लाइसेन्स हिडन ट्रेजरबाट खोसेर नग्मा श्रेष्ठको कम्पनीलाई दिइएको थियो ।
